मुकाम डेस्क । नेकपा (एमाले) का अध्यक्ष केपी शर्मा ओलीले राष्ट्रिय गौरबको भेरी-बबई डाइभर्सन बहुउद्देश्यीय आयोजनाको अवलोकन गरेका छन् ।

ओलीले मंगलबार बिहान आयोजनाको अवलोकन गरेका हुन्। अध्यक्ष ओलीले आयोजनाको गुणस्तरमा सम्झौता गर्नु नहुने बताए ।

काममा केही ढिलाइ भएको बताउँदै उनले छिटो सम्पन्न गर्नुपर्नेमा जोड दिए ।

प्रकृति, खोला, जमिनसँगको कारोबार भएकाले काममा कुनै पनि सम्झौता नगरी यथाशीघ्र सम्पन्न गर्नतर्फ उनले ध्यानाकर्षण गराएका हुन् ।

अध्यक्ष ओलीले गुणस्तरमा गरिने सम्झौताले ठूलो दुर्घटना निम्त्याउने भएकाले कुनै सम्झौता नगर्न आग्रह गरेका थिए ।

‘यो आयोजना कोभिडले गर्दा पनि ढिला भयो। तर त्योभन्दा बढी हाम्रो नेपालीहरुको काममा ढिलाइ गर्ने चलन भएको छ,’ उनले भने, ‘यसलाई गति दिनुपर्छ, जे होस् काम भइरहेको छ यो सम्पन्न हुन्छ ।’

उनले कामको गुणस्तरमा 'कम्परमाइज' गर्न नमिल्ने बताए। भेरी-बबई डाइभर्सनको हालसम्म ३५ प्रतिशत काम सम्पन्न भएको छ ।