काठमाडौं । नेकपाका संयोजक पुष्पकमल दाहाल ‘प्रचण्ड’ले नेपालमा ‘दलाइ लामा’ जन्माउने प्रयास भइरहेको आरोप लगाएका छन् । काठमाडौंमा आयोजित एक कार्यक्रममा बोल्दै उनले नेपालको अवस्था राष्ट्रिय संवेदनशीलताको विषय बनेको बताए ।

प्रचण्डले नेपालमा चीनविरोधी गतिविधि हुन नदिने प्रतिबद्धता राजनीतिक दलहरूले लामो समयदेखि गर्दै आए पनि पछिल्लो समय त्यसको उल्लङ्घन भएको दाबी गरे । उनले दलाइ लामाको जन्मोत्सव मनाइएको प्रसंग उल्लेख गर्दै नेपालमा अर्को दलाइ लामा जन्माउने विषयमा समेत चर्चा भइरहेको बताए ।

उनले जनताले लामो संघर्षबाट प्राप्त गरेका अधिकार खोस्ने प्रयास भइरहेको आरोप लगाए । उत्पीडित वर्ग र समुदायमाथि पुनः उत्पीडन तथा निरङ्कुशता लाद्ने प्रयास भइरहेको भन्दै त्यसविरुद्ध साझा कार्यक्रम बनाएर अघि बढ्नुपर्नेमा उनले जोड दिए ।

गरिब, मजदुर, किसान तथा उत्पीडित समुदायका अधिकार खोस्ने प्रयासविरुद्ध जनतालाई संगठित र आन्दोलित गर्नुपर्ने उनको भनाइ थियो । उनले सदन र सडक दुवैबाट संघर्ष गर्दै आगामी निर्वाचनमार्फत पनि प्रतिरोध गर्नुपर्ने बताए ।

प्रचण्डले सबै वामपन्थी शक्ति एकजुट भएर साझा न्यूनतम कार्यक्रमका साथ अघि बढे जस्तोसुकै चुनौती सामना गर्न सकिने दाबी गरे । उनले देशभरबाट ठूलो संख्यामा जनता काठमाडौं र जिल्ला सदरमुकाममा उतारेर दबाब सिर्जना गर्न सकिने धारणा पनि राखे ।