काठमाडौं । फिफा विश्वकप–२०२६ अन्तर्गत समूह ‘जे’ को अन्तिम खेलमा अर्जेन्टिनाले जोर्डनलाई ३–१ ले पराजित गर्दै समूह चरणमा शतप्रतिशत नतिजा कायम राखेको छ ।

खेलको सुरुवातदेखि नै आक्रामक देखिएको अर्जेन्टिनाले पहिलो हाफमै दुई गोलको अग्रता बनाएको थियो । टोलीका लागि १९औँ मिनेटमा लो सेल्सोले गोल गर्दै खाता खोले भने ३१औँ मिनेटमा लाउटारो मार्टिनेजले अग्रता दोब्बर बनाए ।

पहिलो हाफमा विश्राम पाएका कप्तान लियोनल मेसी दोस्रो हाफमा मैदान उत्रिएका थिए । उनले खेलको ८०औँ मिनेटमा गोल गर्दै अर्जेन्टिनाको जित सुनिश्चित गरे। जारी प्रतियोगितामा मेसीको यो छैटौँ गोल हो ।

जोर्डनले ५५औँ मिनेटमा मुसा अल तामारीमार्फत एक गोल फर्काए पनि खेलमा पुनरागमन गर्न सकेन ।

यसअघि नै नकआउट चरणमा स्थान बनाइसकेको अर्जेन्टिनाले समूह चरणका तीनै खेल जित्दै ९ अंकसहित शीर्ष स्थानमा आफ्नो यात्रा टुङ्ग्याएको छ ।