पोखरा । प्रथम राष्ट्रिय कोदो दिवस, २०८२ को अवसरमा भोलि पोखरामा कोदोजन्य बालिका परिकारहरूको प्रदर्शनी तथा कोदो उत्पादक कृषकहरू सम्मान कार्यक्रम गरिने भएको छ । पोखरा महानगरपालिका आर्थिक विकास महाशाखा अन्तरगत कृषि विकास शाखाको आयोजनामा शुक्रबार उक्त कार्यक्रम आयोजना गरिएको महाशाखा प्रमुख मनहर कडरियाले जानकारी दिए।

नेपाल सरकारले “कोदोजन्य परिकारको आहार, खाद्य सुरक्षा र स्वस्थ जीवनको आधार” भन्ने नाराका साथ देशव्यापी रूपमा राष्ट्रिय कोदो दिवस मनाउने लागेको हो ।

दिवसका अवसरमा पोखरामा कोदो कागुनो लगायतका कोदोजन्य बालीरखेती उत्पादन गर्ने कृषकलाई सम्मान तथा प्रोत्साहन प्रदान गर्ने कार्यक्रम समेत रहेको छ ।

परम्परागत बालीको संरक्षण, कोदोजन्य पोषिलो अन्नको प्रवर्द्धन, कृषकहरूको आम्दानी वृद्धि, कोदो खेती प्रति कृषकहरूको आकर्षण वृद्धि र स्थानीय खाद्य प्रणाली सुदृढ तथा खाद्य सुरक्षालाई टेवा प्रदान गर्ने मुख्य उद्देश्यले कोदो दिवस विशेष कार्यक्रम आयोजना गरिएको कडरियाले बताए ।