काठमाडौँ -   कालिञ्चोक सेकेण्ड सेकेण्डमा नयाँ नयाँ स्वरूपमा देखिन्छ कालिञ्चोक। आँखा झिमिक्क समेत गर्न दिँदैन यहाँको प्रकृतिले । युवा पुस्ता हिउँ खेल्नलाई उपयुक्त मान्छन् कालिञ्चोक । तर,  हामीजस्ता प्रकृतिप्रेमीलाई वर्षायाम नै उपयुक्त लाग्छ । 

प्रकृतिको छिनछिनमा रूप फेरिरहँदा हेरिरहन मन लाग्छ ।  हिउँदमाभन्दा वर्षायाममा नै बढी घुम्न मन पराउँछन । अझ कालिञ्चोक क्षेत्रको कुरा गर्नुपर्दा वर्षायामभरि यतै बसौं लाग्छ ।

यहाँ चरिरहेको चौरी, याकले झनै मन लोभ्याउँछ। रंगीविरंगी फूलहरूको बयान गरिरहुँ झैं लाग्ने ।  कालिञ्चोक हरेक सिजनमा घुम्न उपयुक्त ठाउँ हो । झन् वर्षायाममा एक पटक घुमेका मान्छेलाई कहिले आउला वर्षायाम भनेर सोचमग्न बनाउँछ ।

कालिञ्चोकमा यही सिजन हो चौरीको घ्यू, छुर्पी पाउने । दिनभरि यहाँको हरियाली फाँटहरूमा चौरी चरण नियाल्दा घण्टौं बितेको पत्तै हुँदैन । कालिञ्चोकमा पटक पटक पुगे पनि । , हरेक पटक नयाँ नयाँ नै देखिन्छ । जता हेरे पनि हेरिरहुँ झैं लाग्ने । त्यसैले कालिञ्चोकलाई तपस्वीहरूको तपोभूमि, प्रकृतिसँग रमाउनेहरूको क्रिडास्थल मानिन्छ । त्यस्तै धर्मकर्म गर्नेहरूको लागि पुण्यभूमि अनि प्रकृति, धर्म र साहसिक यात्राको उत्कृष्ट त्रिवेणीधाम हो ।

कालिञ्चोक सदरमुकाम चरिकोटबाट १७ किलोमिटरमा पुग्न सकिन्छ । कालिञ्चोक मन्दिर ३ हजार ८ सय ४२ मिटरको उचाइमा छ । पैदल यात्राबाट पनि सजिलै पुग्न सकिने यस ठाउँमा हाल दैनिक रूपमा गाडीको सुविधा छ। अनेकौ किम्वदन्ती र पौराणिक कथाहरूमा समेत वर्णित यसको महिमा व्यापक छ ।

विशेषगरी जनैपूर्णिमा, कार्तिक पूर्णिमा, चैतेदसैं, दसैं, नयाँ वर्षका दिन भव्य मेला लाग्ने यो पुण्यभूमिमा वर्षैभरी दर्शनार्थीहरूको बाक्लै उपस्थिति हुन्छ । प्रकृतिका छटाहरू नयनमा सजाउँदै, पाइलै पिच्छे गुञ्जने चराचुरूङ्गीका कर्णप्रिय वाणीहरूले यात्रालाई सजिलो र छोटोको आभास दिलाउँछ ।

त्यस्तै, फागुनदेखि वैशाखको समयमा सेताम्य फूलेका चिमाल, लालीगुराँसले झनै कालिञ्चोकको शोभालाई बढाउने गरेको पाइएको छ । आँखै नजिक देखिएका गौरीशंकर हिमाल लगायत हिमश्रृङ्खलाले संवेदनशील मनहरूलाई तरंगीत गर्दछ।
बस्नको लागि देउराली, गैरी, कुरीका शेर्पा, तामाङ समुदायले गरेका आतिथ्य सत्कारले पटक पटक कालिञ्चोकको यात्रा सधैँ गरौं गरौं लाग्छ ।

                             स्रोत: जीवन लामा  सेतोपाटी न्युज