काठमाडौं । नेपाल–चीन सीमाक्षेत्रमा आएको भीषण बाढी र पहिरोले दुवै देशमा ठूलो जनधनको क्षति पुर्‍याएको छ । नेपालको रसुवास्थित भोटेकोशी नदीमा आएको बाढीले नेपालतर्फ ठूलो क्षति पुर्‍याउनुका साथै चीनको तिब्बत स्वायत्त क्षेत्रअन्तर्गत केरुङ क्षेत्रमा समेत गम्भीर प्रभाव पारेको छ ।

चिनियाँ समाचार संस्था सिन्ह्वालाई उद्धृत गर्दै प्राप्त विवरणअनुसार बुधबार बिहान आएको बाढी तथा पहिरोका कारण केरुङ बन्दरगाह क्षेत्रको सडक, विद्युत् र सञ्चार सेवा पूर्ण रूपमा अवरुद्ध भएको छ । हालसम्म केरुङ क्षेत्रमा ३ जनाको मृत्यु भएको र २६५ जना सम्पर्कविहीन रहेको पुष्टि भएको जनाइएको छ ।

नेपालतर्फ भोटेकोशीको बाढीले रसुवाको टिमुरे तथा केरुङ नाकाआसपासका क्षेत्र ध्वस्त पारेको छ। बाढीका कारण नेपालमा करिब तीन सय जनाको मृत्यु भएको अनुमान गरिएको छ भने सुरक्षाकर्मी, स्थानीय तथा मजदुर गरी दर्जनौँ व्यक्ति सम्पर्कविहीन रहेको बताइएको छ ।

बाढी र पहिरोले नेपाल–चीन जोड्ने पुल, सडक तथा सञ्चारलगायतका भौतिक पूर्वाधारमा समेत गम्भीर क्षति पुर्‍याएको छ ।

उद्धारमा चिनियाँ सेना परिचालन
चीन सरकारले केरुङ क्षेत्रमा उद्धार तथा राहत कार्यलाई तीव्र बनाउन चिनियाँ जनमुक्ति सेना ९पीएलए० परिचालन गरेको छ । पश्चिमी थिएटर कमान्डअन्तर्गतको निर्देशन समूहलाई वाई–२० सैनिक परिवहन विमानमार्फत तिब्बत पठाइएको जनाइएको छ । उक्त टोलीले प्रभावित क्षेत्रमा सैन्य उद्धार तथा समन्वयको काम गर्नेछ ।

यसैबीच, छेन्दुबाट उडेको वाई–२० विमानमार्फत १११ जना आपत्कालीन उद्धारकर्मी शिगात्सेस्थित डिङ्ग्री विमानस्थलमा अवतरण गरिसकेका छन् । जीवन उद्धार, भग्नावशेष हटाउने तथा सञ्चार सेवा पुनःस्थापनाका लागि आवश्यक आधुनिक उपकरणसहित आएका उद्धारकर्मी केरुङ बन्दरगाहतर्फ अघि बढिरहेका छन् ।

तर सडक सञ्जालमा व्यापक क्षति पुगेकाले उद्धार टोलीलाई प्रभावित क्षेत्रसम्म पुग्न कठिनाइ भइरहेको जनाइएको छ ।

नेपालतर्फ पनि नेपाली सेना, नेपाल प्रहरी र सशस्त्र प्रहरीको टोली उद्धार तथा खोजी कार्यमा खटिएका छन् । दुवै देशका सीमावर्ती क्षेत्रमा यातायात तथा सञ्चार सेवा अवरुद्ध भएकाले क्षतिको विस्तृत विवरण आउन बाँकी रहेको छ ।