काठमाडौं । पूर्वमन्त्रीसमेत रहेका नेपाली कांग्रेसका नेता मोहम्मद् अफ्ताब आलमविरुद्धको मुद्धाको सुनुवाइ रौतहट जिल्ला अदालतका न्यायाधीश मातृकाप्रसाद आचार्यको इजलासमा तोकिएको छ । लामो अन्यौलकाबीच आलमविरुद्धको ४ वर्ष पुरानो मुद्दाको अन्तिम सुनुवाइका लागि आज पेशी तोकिएको हो ।

रौतहट जिल्ला अदालतमा रहेको विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यान सम्बन्धीको कसूरको मुद्दामा अन्तिम सुनुवाइका लागि आइतबार पेसी तोकिएको थियो । आइतबार गोला तान्ने क्रममा फाँट नम्बर ५ को गोला न्यायाधीश आचार्यले तानेका थिए ।

माघ २८ गते आइतबारबाट निरन्तर सुनुवाइ हुने गरी रौतहट जिल्ला अदालतले आलम लगायतका ११ जनाविरुद्ध दायर भएको विस्फोटक पदार्थ बम समेतको प्रयोग गरी ज्यान मार्ने उद्योग तथा कर्तव्य ज्यान सम्बन्धी कसुरमा अन्तिम सुनुवाइका लागि पेसी तोकेको हो ।