काठमाडौं । पूर्वसभामुख समेत रहेका नेकपा (एमाले)का नेता कृष्णबहादुर महराका छोरा राहुल महरालाई थुनामै राख्न उच्च अदालत पाटनले आदेश दिएको छ । थुनामुक्त भई मुद्दाको पुर्पक्ष गर्न पाउनुपर्ने माग राख्दै निवेदन दिएका महराको मागलाई अस्वीकार गर्दै उच्च अदालतले थुनामै राखेर पुर्पक्ष गर्न आदेश दिएको हो ।

भन्सार चोरी पैठारी र सङ्गठित अपराधको कसुरमा महरा थुनामा रहेका छन् । बिहीबार उच्च अदालत पाटनका न्यायाधीशद्वय अन्जु उप्रेती ढकाल र दीपेन्द्र अधिकारीको इजलासले काठमाडौँ जिल्ला अदालतकै आदेश सदर गरेको छ ।

६० किलो सुन तस्करीका प्रमुख पात्र रहेका दावा छिरिङ लगायतका व्यक्तिसँग कनेक्सन देखिएको र सुन तस्करीमा संलग्न रहेको भन्दै उनकाविरुद्ध सीआइबीको प्रतिवेदनको आधारमा काठमाडौँ जिल्ला अदालतमा आपराधिक विश्वासघात, भन्सार चोरी पैठारी र सङ्गठित अपराधमा मुद्दा दायर भएको थियो ।