काठमाडौं । श्रम संस्कृति पार्टी र पूर्व माओवादी नेता सुदन किरातीबिच एकतामा सहमति भएको छ । हर्क साम्पाङ नेतृत्वको पार्टीमा किराती प्रवेश गर्ने सहमति भएसँगै आज औपचारिक घोषणा हुन लागेको हो । 

पार्टी महासचिव आरएन राईका अनुसार आज दिउँसो तीन बजे काठमाडौँको बागबजारस्थित हार्दिक होटलमा हुने कार्यक्रममा किराँतीसँग एकताको घोषणा हुनेछ । 

पार्टी एकता कार्यक्रममा श्रम संस्कृति पार्टीका शीर्ष नेताहरू र किराँती पक्षधर नेता(कार्यकर्ताको उपस्थिति रहने बताइएको छ। त्यसक्रममा पार्टीको भावी कार्यदिशाबारे समेत स्पष्ट पारिने राईले बताए । 

स्रोतका अनुसार एक महिनाअघि नै श्रम संस्कृति पार्टीमा किराँतीलाई साम्पाङपछिको दोस्रो वरियतासहितको वरिष्ठ नेता र कोसीको मुख्यमन्त्री दिने सहमति भइसकेको थियो । 

तर, पछिल्लो समय सामपाङले किराँतीलाई वरिष्ठ नेता र कोसीको मुख्यमन्त्री दिन आनाकानी गरेपछि उनी कुलमान घिसिङसँगसमेत नजिकिएका थिए ।

घिसिङ नेतृत्वको उज्यालो नेपाल पार्टी र सुदन किराँतीको समूहबीच एकता प्रयोजनका लागि छलफलसमेत भएको थियो ।