काठमाडौं । महिला पर्यटन व्यवसायी सञ्जालले हाइकिङ्ग कार्यक्रम आयोजना गरेको छ ।

महिला पर्यटन व्यवसायी निर्मला धमलाको अध्यक्षतामा पर्यटकीय क्षेत्रको विकास र विस्तार गर्ने मुख्य उद्देश्यले आइतवार सूर्यविनायक नगरपालिका वडा नं. ४ दधिकोट अनन्तलिङ्गेश्वर हुँदै रिसाल डाँडासम्म हाइकिङ्ग कार्यक्रम गरेको हो । 

उक्त स्थानमा हाल आन्तरिक तथा वाह्य पर्यटकहरुको चहलपहल बढ्दै गइरहेको छ । प्राकृतिक रुपमा मनोरम स्थल रहेको उक्त स्थानबाट काठमाडौँ उपत्यका तथा आसपासका विभिन्न डाँडाकाडाँहरुको दृष्यावलोकन गर्न सकिन्छ । त्यस्तै रिसाल डाँडाबाट २२ वटाभन्दा बढी हिमालहरुको अवलोकन गर्न पाइन्छ ।

पर्यटन व्यवसायी लक्ष्मी अधिकारी भनिन्, ‘भक्तपुरमा पर्यटन क्षेत्रको अथाह सम्भावना र भविष्य रहेको छ । यसले यहाँको विकास र समृद्धिमा मात्र नभई आर्थिक समृद्धिमा समेत ठूलो टेवा पुग्नेछ । सबैजना आ–आफ्नो ठाउँबाट लागे पर्यटनलाई उद्योग र उत्पादनसँग जोडेर असंख्य रोजगारी सिर्जना गर्न सकिन्छ । यो ठाउँ प्राकृतिक रुपमा मनोरम छ, भविष्यमा पर्यटकीय क्षेत्रको ठूलो सम्भावना बोकेको क्षेत्र हो । सम्भावनालाई यथार्थमा रुपान्तरण गर्न हामीले हाइकिङ्ग कार्यक्रम आयोजना गरेका हौं ।’