काठमाडौँ । हमासको नियन्त्रणमा रहेका कञ्चनपुरका विपिन जोशीको रिहाइका लागि हमाससँग प्रतिनिधिसभा अन्तर्गत रहेको अन्तर्राष्ट्रिय सम्बन्ध र पर्यटन समितिले आग्रह गरेको छ । 

समितिले विपिन जोशीको रिहाइका लागि हमास लगायत अन्तर्राष्ट्रिय समुदायलाई आग्रह गरेको हो । इजरायली भूमिमा गत सात अक्टुबरमा हमासले आक्रमण गर्दा १० जना नेपाली मारिएका थिए भने जोशी सम्पर्कविहीन भएका थिए । उनलाई हमासले लगेको विश्वास गरिएको छ। हाल इजरायल र हमासबीच अस्थायी युद्धविराम लागू हुँदा हमासले इजरायली र थाइ नागरिकलाई रिहा गरेको छ ।  

यसैबीच आज बिहीबार बसेको समितिको बैठकले विपिन जोशीको रिहाइका लागि आग्रह गर्दै विज्ञप्ति जारी गर्ने निर्णय गरेको सभापति राजकिशोर यादवले जानकारी दिए । 

‘विपिन जोशीको विना शर्त अविलम्ब रिहाइका लागि हमास लगायत अन्तर्राष्ट्रिय शक्तिहरूसँग आग्रह गरेका छौँ’, सभापति यादवले भने, ‘नेपाल कुनै पनि पक्षधरता देश नरहेको र हामी जहिले पनि शान्तिको वकालत गर्ने भएकाले हाम्रो नागरिकलाई कुनै पनि कारणविना यसरी बन्धक बनाइनुहुँदैन भन्ने हाम्रो मान्यता हो ।’