अस्तव्यस्त सडकः मर्मतसम्भार नै हुँदैन [फोटोफिचर]

खबर मुकाम
२०७९ माघ २१ शनिबार

खबरमुकाम । सडकैपिच्छे ट्राफिक पूर्वाधारहरुको अस्तव्यस्त स्वरुप प्रशस्तै देखिन्छन् र भेटिन्छन् । नेपालको संघीय राजधानी काठमाडौं उपत्यकामा ट्राफिक व्यवस्थापन हुन नसक्नु अर्को बिडम्बना छ ।

सडकका खाल्डाखुल्डी नागरिकले वास्तै गर्न छोडिसके, रहरले होइन, सरकारको अटेरीपनले । घरबाट बाहिर निस्किएर गाडी चढ्ने बित्तिकै कुनबेला कुन चोकमा जाम पर्ने हो पत्तै हुँदैन । ट्राफिक पूर्वाधारहरुको अस्तव्यस्तताले दिनप्रतिदिन सडक दुर्घटना बढिरहेका छन् ।

कतै सडकमा बत्ती नै राखिएको छैन भने कतै सडक सुरक्षाका सामग्रीहरु जथाभाबी फालिएको छ । नो पार्किङ लेखिएका बोर्डहरु सडकको कुनामा भाँचिएर फालिएको छ भने सडकको बीचमै अस्तव्यस्त रुपमा सडक सुरक्षासम्बन्धी सामग्रीहरु फालिएका हुन्छन् । सडक छेउको बारहरु भत्किएपछि मर्मतसम्भार नै वर्षौँसम्म हुँदैन । ट्राफिक बत्ती छ तर प्रयोगमा आएका छैन वा बिग्रिएको ट्राफिक बत्ती छ ।