राष्ट्रियसभा उपनिर्वाचनका लागि निर्वाचन आयोगले तोक्यो मतदान केन्द्र

नारायण गाउँले
२०७८ वैशाख १७ शुक्रबार

काठमाडौं । निर्वाचन आयोगले मतदान केन्द्र तोकेको छ । आगामी जेठ ६ गते हुने बागमती प्रदेशको रिक्त राष्ट्रिय सभा सदस्यको उपनिर्वाचनका लागि मतदान केन्द्र तोकेको हो ।

शुक्रबार एक विज्ञप्ति जारी गर्दै राष्ट्रिय सभा सदस्य निर्वाचन नियमावली, २०७६ को नियम २३ को उपनियम ९३० बमोजिम हेटौंडा उप–महानगरपालिका वडा–४ स्थित भुटनदेवी माविलाई मतदान स्थल तोकिएको आयोगका प्रवक्ता राजकुमार श्रेष्ठले जानकारी दिएका हुन् ।

उक्त मतदान स्थलमा प्रदेशसभा सदस्य ११० जनाका लागि केन्द्र (क) तोकेको छ । गाउँपालिकाका अध्यक्ष, उपाध्यक्ष तथा नगरपालिकाका प्रमुख, उपप्रमुख २३८ जनाका लागि केन्द्र (ख) तोकोको छ भने छुटुृाछुटृै मतदानकेन्द्र तोकेको उक्त जारी विज्ञप्तिमा उल्लेख छ ।

नेकपा माओवादी केन्द्रले रामबहादुर थापा बादल आफ्नो दलमा नरहेको भन्दै संसद सचिवालयलाई पत्र पठाएपछि उनको पद रिक्त भएको थियो ।

यसैगरी प्रवक्ता श्रेष्ठले आजै निर्वाचन अधिकृत, प्रदेश निर्वाचन अधिकारी र कम्प्यूटर अपरेटरका लागि राष्ट्रिय सभा सदस्य निर्वाचन सञ्चालन तथा व्यवस्थापन सम्बन्धी अभिमुखीकरण कार्यक्रम सम्पन्न भएको पनि जानकारी दिएका छन् ।