अख्तियार पूर्व आयुक्त बस्न्यातद्वारा बन्दी प्रत्यक्षीकरणको रिट दायर

नारायण गाउँले
२०७८ वैशाख १७ शुक्रबार

काठमाडौं । अख्तियार दुरुपयोग अनुसन्धान आयोगका पूर्व प्रमुख आयुक्त दिप बस्न्यातले बन्दी प्रत्यक्षीकरणको रिट दायर गरेका छन् ।

बालुवाटार जग्गा प्रकरणमा आफूलाई पुर्पक्षमा राखेर अनुसन्धान गर्ने विशेष अदालतको फैसला गलत रहेको भन्दै थुनामुक्त गरि पाउन भनि रिट दायर भएको हो ।

भौतिक पूर्वाधार सचिव भएका बेला बालुवाटारको सरकारी जग्गा व्यक्तिका नाममा लैजाने फाइल उठाएको देखिएकाले अख्तियारले आफ्नै पूर्व प्रमुख आयुक्तविरुद्ध विशेष अदालतमा भ्रष्टाचार मुद्दा दायर गरेको थियो । विशेष अदालतले २०७७ मंसिर २८ गते बस्न्यातलाई थुनामा राख्न आदेश दिएको थियो ।

लकडाउनका बेला बन्दी प्रत्यक्षीकरणा र कोभिड संकटबाहेकका अरु मुद्दा अदालतले नहेर्ने भएकाले सोही सुविधा प्रयोग गर्दै बस्न्यात थुनामुक्तिको माग गर्दै अदालत गएका छन् ।

बस्न्यातको पक्षबाट प्रज्ज्वल अधिकारीले दायर गरेको बन्दी प्रत्यक्षीकरणको रिटसँगै उनलाई कोभिड पोजेटिभ भएको रिपोर्ट प्रमाण पेस गरिएको छ ।