प्रदेश सभा सदस्यबाट पदमुक्त भएका ४ जना सर्वोच्च जाँदै

नारायण गाउँले
२०७८ वैशाख १७ शुक्रबार

काठमाडौं । आफूहरूलाई प्रदेश सभा सचिवालयले पदमुक्त गरेको भन्दै जनता समाजवादी पार्टीका ४ जना प्रदेश सभा सदस्य कानुनी उपचार खोज्न सर्वोच्च अदालत जाने भएका छन् ।

पार्टीको कुनै आधिकारिक निर्णयबिना आफूहरुलाई प्रदेश सभा सचिवालयले पदमुक्त गरेको भन्दै त्यसविरूद्ध आजै सर्वोच्च अदालतमा जाने भएका हुन् ।

लुम्बिनी प्रदेश सभाले पदमुक्त गरेपछि जसपाका ४ जना प्रदेश सभा सदस्य कानुनी उपचार खोज्न अदालत जाने जसपा नेता तथा लुम्बिनी प्रदेशका भौतिक पूर्वाधार विकास मन्त्री सन्तोष पाण्डेयले बताएका छन् ।

प्रदेश सभा सचिवालयले बिहीबार सूचना जारी गरी जसपा केन्द्रीय कार्यकारिणी समितिले राजनीतिक दलसम्बन्धी ऐन २०७३ को दफा ३२ को उपदफा–५० बमोजिम प्रदेशसभा सदस्य र पार्टी सदस्यबाट निष्काशन गरेको र सोही अनुरूप चार जना सांसदलाई पदमुक्त गरिएको उल्लेख छ ।

लुम्बिनी प्रदेश सभा सचिवालयका सचिव दुर्लभकुमार पुनले जसपाको केन्द्रीय कमिटीको माइन्युटसहितको सूचना लुम्बिनी प्रदेश सभा सचिवालयमा पेश भएकाले त्यसैका आधारमा पदमुक्त गरिएको बताएका छन् ।

वैशाख ६ गते लुम्बिनीका मुख्यमन्त्री शंकर पोखरेलविरूद्घ अविश्ववास प्रस्ताव दर्ता भएको थियो ।

त्यसलगतै जनता समाजवादी पार्टीका पाण्डेयसहित विजयकुमार यादव, सुमन शर्मा रायमाझी र कल्पना पाण्डेलाई मन्त्री बनाइएको थियो ।

प्रदेश सभामा जसपाका ६ मध्ये ४ जना सांसद सरकारमा सहभागी भए पनी सहसराम यादव र पुर्मती ढेगाले सरकारमा जाने निर्णयको विरोध गर्दै आएका छन् ।

सन्तोषकुमार पाण्डेय रुपन्देही क्षेत्र नम्बर ३ (१) र विजयकुमार यादव बाँके क्षेत्र नम्बर २(१) बाट प्रत्यक्ष निर्वाचित सांसद हुन् । त्यस्तै सुमन शर्मा रायमाझी र कल्पना पाण्डे समानुपातिक सांसद हुन् ।

सरकारमा सहभागी भएको विषयलाई लिएर जसपाको लुम्बिनी प्रदेश कमिटीमा मात्र होइन पार्टीको केन्द्रीय कार्यकारिणी परिषदमासमेत विवाद हुँदै आएको छ ।