कर्णाली सरकारले कोरोना रोकथाम तथा उपचारमा १ अर्ब बजेट छुट्यायो

नारायण गाउँले
२०७८ वैशाख १६ बिहीबार

काठमाडौं । कोरोना महामारी रोकथाम, नियन्त्रण, उपचार तथा प्रतिकार्यका लागि कर्णाली प्रदेश सरकारले १ अर्ब रुपैयाँको बजेट छुट्याएको छ ।

कर्णाली सरकारका प्रवक्ता मन्त्री विमला केसीको अनुसार छुट्याइएको उक्त रकमबाट तत्काल ५० करोड रुपैँया विकास खर्चबाट रकमान्तर गरी कोभिड कोषमा राख्ने व्यवस्था मिलाइएको छ ।

तत्काल प्रदेश अस्पताल सुर्खेतलाइ कोरोना महामारी नियन्त्रण तथा स्वास्थ्य पूर्वाधार सुदृढीकरणका लागि २२ करोड रुपैयाँ बजेट दिइएको जनाइएको छ । १२ करोड रुपैयाँ बजेट निकास गरी चौरजहारी सामुदायिक अस्पताल, जिल्ला अस्पतालहरु र रणनैतिक अस्पताललाई पठाइएको जानकारी केसीले दिइन् । उनले पत्रकार सम्मेलनमा प्रदेश भित्रिने ४ वटा नाकाहरुमा थप स्वास्थ्यकर्मीसहित एन्टिजेन परीक्षण र स्क्रिनिङको व्यवस्था पनि भएको बताइन् ।

केसीले उक्त क्षेत्रको प्रदेशसभामा जनप्रतिनिधि थोरै भएको कारण स्वास्थ्यका आधारभूत मापदण्डहरु अपनाई प्रदेशसभा सञ्चालन गर्न सकिने बताउँछिन् ।