रुसले नेपाललाई ८० लाख डोज कोभिड–१९ विरुद्घको खोप बेच्ने

खबरमुकाम
२०७८ वैशाख १६ बिहीबार

काठमाडौं । रुसले नेपाललाई कोभिड–१९ विरुद्घको खोप किन्न दिने प्रतिबद्धता जनाएको छ ।

मस्कोबाट आएको उच्चस्तरीय टोली र स्वास्थ्य तथा जनसंख्यामन्त्री हृदयेश त्रिपाठीबीच आगामी डिसेम्बरसम्ममा नेपालले ८० लाख डोज खोप खरिद गर्ने बारे छलफल भएको हो ।

दुई पक्षबीच मूल्यको विषयमा सहमति भने भएको छैन । ‘रुससँग सहुलियतमा खोप उपलब्ध गराउन र अनुदानमा समेत दिन आग्रह गरेका छौं । रुसी खोप ल्याउने करिब–करिब तय भइसकेको छ । दुई–चार दिनमा यो विषयमा टुंगो लाग्छ,’ मन्त्री त्रिपाठीले भने ।

अनुदानका लागि चिठी लेखिसकेको र नेपालको आवस्यकता अनुसार रुसले पर्याप्त खोप निर्यात गर्न सक्ने मन्त्री त्रिपाठीले बताएका छन् । औषधि व्यवस्था विभागले आपत्कालीन प्रयोगका लागि रुसी खोपलाई स्वीकृति दिएको छ ।

उक्त खोप नेपालमा आयात गर्न लोमस फर्मास्युटिकल्सले अनुमति पाएको भए पनि सरकार भने जीटूजी प्रक्रियाबाटै खोप ल्याउने तयारीमा लागेको छ ।