प्रदेश–२ः राज्यमन्त्री कुशवाहाको मुद्दा फिर्ता, अर्का राज्यमन्त्री शर्माको अभियोग यथावत

खबर मुकाम
२०७८ वैशाख १६ बिहीबार

जनकपुर । जसपा नेता कार्यकर्ता माथि लागेको मुद्दा फिर्ता लिने निर्णय गरेसँगै प्रदेश–२ का आन्तरिक मामिला तथा कानून राज्यमन्त्री सरोज सिंह कुशवाहाको मुद्दा फिर्ता भएको छ ।

कुशवाहामाथि बलवा प्रहरी चौकी तोडफोड तथा आगजनीको मुद्दा रहेको छ । मधेस आन्दोलनका क्रममा प्रहरी चौकीमा आक्रमण गरेको आरोपमा कुशवाहासहित १९ जनामाथि मुद्दा चलाइएको थियो ।

जसपाको आग्रहमा सरकारले १५ घटनाका १२० जनाको सरकारवादी मुद्दा फिर्ता लिएको छ । जसमा बलवा प्रहरी चौकीमाथि भएको आक्रमणको घटनामा संलग्न भनिएका १९ जनाको मुद्दा समेत फिर्ता भएको छ ।

उक्त घटनामा संलग्न मनरासिस्वा नगरपालिकाकी उपमेयर रमिता प्रधानकी श्रीमान् विनोद गामीको मुद्दा पनि फिर्ता भएको छ ।

सोही प्रदेशका सामाजिक विकास राज्यमन्त्री अभिराम शर्माको मुद्दा भने फिर्ता भएको छैन ।

सामाजिक विकास राज्यमन्त्री अभिराम शर्मालाई सशस्त्र प्रहरीका असई थमन विक हत्याको आरोप छ । सोही घटनामा संलग्न २८ जनामाथि मुद्दा छ । उक्त घटनासँग सम्बन्धित कसैको पनि मुद्दा पनि फिर्ता भएको छैन ।

मधेस आन्दोलन उग्र बनेको बेला ०७२ भदौ २५ मा जलेश्वरमा भएको झडपमा घाईतेभएका असई बिकलाई उपचारका लागि एम्बुलेन्समार्फत जनकपुरधाम ल्याउने क्रममा बाटोमै थुतेर अभिराम शर्माको समुहले उनको हत्या गरेको थियो ।