यति एयरलाइन्स हवाई कार्गोमा भन्सार कार्यालय र राजश्व अनुसन्धान विभागको छापा

नारायण गाउँले
२०७८ वैशाख १६ बिहीबार

काठमाडौं । त्रिभुवन विमानस्थल भन्सार कार्यालय र राजश्व अनुसन्धान विभागले बैशाख ४ र ६ गते यति एयरलाइन्सको हवाई कार्गोमा छापा हानी राजश्व छलीका सामान बरामद गरेको छ ।

मालसामान ओसार–पसार गर्नुपूर्व ढुवानी हुने वस्तुको विवरण राजश्व अनुसन्धान विभागले केन्द्रीय सूचना प्रणालीमा जानकारी गराउनुपर्ने व्यवस्था लागु गरेको छ । मालवस्तु तथा ढुवानी साधनको अनुगमन प्रणाली (भिसिटिए) भनिने उक्त प्रणालीलाई छलेर हवाईमार्गबाट सामान ढुवानी गरी राजश्व छली गरेको भेटिएको छ ।

झापा भन्सार प्रशासन र जनपद प्रहरीको सूचनाको आधारमा विभागले भद्रपुरबाट काठमाडौं आएको यति एयरलाइन्सको हवाई कार्गोमा छापा हानेको कुरा राजश्व अनुसन्धान विभागका प्रवक्ता शिवलाल तिवारीले बताए ।

‘क्रेता नक्कली हो कि भन्ने शंका लागेर केही पोका सामान हामीले राजश्व अनुसन्धान विभागमा ल्याएका छौं । सामान धनी विभागमा आइपुगेको छैनन्, हामी त्यसको खोजीमा छौं,’ तिवारीले बताए ।

भन्सार कार्यालय श्रोतले जनाए अनुसार बरामद भएको सामान अमित इन्टरप्राइजेजको नामबाट भिसिटिएस प्रणालीमा राखिएको देखिन्छ । तर सो सामान काठमाडौं पठाउँदा भने व्यक्तिको नाममा पठाइएको भेटिएको छ ।
सामान्य बिलमात्र काटेर पठाएको र अरु कुनै कागजात नभएका कारण सामान कहाँबाट ल्याइएको हो भन्ने नखुलेको र बाहिरबाट आयात भएको सामानजस्तो देखिए पनि प्रज्ञापनपत्र नभएको जनाइएको छ

बरामद भएका सामानमा लेडिज टप्स ७९१ थान, लेडिज कुर्ता ९८ थान, गन्जी ११८ थान र सारी ५५ थान लगायत सामग्री भेटिएका छन् ।