लुम्बिनी प्रदेशसभाको विशेष अधिवेशन डाकियो

खबर मुकाम
२०७८ वैशाख १४ मंगलबार

रुपन्देही । लुम्बिनी प्रदेशसभाको विशेष अधिवेशन वैशाख १९ गतेलाई डाकिएको छ ।

लुम्बिनी प्रदेशसभामा मुख्यमन्त्री शंकर पोखरेलविरुद्घ दर्ता भएको अविश्वासको प्रस्तावको टुंगो लगाउन विशेष अधिवेशन डाकिएको हो ।

प्रदेश प्रमुखको कार्यालयबाट प्राप्त पत्रअनुसार वैशाख १९ आइतबार दिनको दिउँसो एक बजे बस्ने गरी प्रदेशसभाको विशेष अधिवेशन आह्वान गरिएको प्रदेशसभा सचिवालयले जनाएको छ ।

प्रदेशसभा सचिव दुर्लभकुमार पुनमगरले विशेष अधिवेशन सम्बन्धमा पत्र प्राप्त भइसकेको बताएका छन् । सूचना प्रकाशित सभामुखसँगको छलफलपछि गर्ने तयारी भइरहेको बताएका छन् ।

गत वैशाख ६ गते नेपाली कांगे्रस, नेकपा माओवादी केन्द्र, जनता समाजवादी पार्टीलगाएतका प्रदेश सभा सदस्यहरुले मुख्यमन्त्री पोखरेलविरुद्ध प्रदेशसभामा अविश्वास प्रस्ताव दर्ता गरेका थिए ।

त्यसलगत्तै विपक्षी दलले प्रदेश प्रमुखको कार्यालयमा विशेष अधिवेशन बोलाउन माग गर्दै गरेका थिए ।

अविश्वासको प्रस्ताव ल्याउन नेतृत्व गरेको माओवादी केन्द्रका सभामुखसहित १८ र नेपाली कांग्रेसका १९ सांसद भने जसपामा एमाले र नयाँ मोर्चा कसलाई साथ दिने विषयमा विवाद छ ।

प्रदेशसभामा अहिले कायम रहेका ८५ सांसदमध्ये मुख्यमन्त्री शंकर पोखरेलले नेतृत्व गरेको नेकपा एमालेका ४१ सांसद छन् ।

त्यसैगरी हालै सरकारमा सामेल जसपाका ६ सांसद छन्, जसमध्ये ४ जना मन्त्री नै बनेका छन् ।

कांग्रेस माओवादीले एमालेभित्रका केही सांसद र जसपाका सांसदले अविश्वासको पक्षमा मत हाल्ने अपेक्षासहित अगाडि बढेका छन्।

कांग्रेस माओवादीलाई साथ दिने २ सांसद जसपामा छन् भने १ सांसद भएको जनमोर्चाले अविश्वासको पक्षमा मतदान गर्ने घोषणा गरेको छ ।

प्रदेशसभाको हिउँदे अधिवेशन चैत २५ गते अन्त्य भएको थियो ।