जिउँदो उल्लुचरा सहित एक जना पक्राउ

नारायण गाउँले
२०७८ वैशाख १४ मंगलबार

काभ्रे । प्रहरीले संरक्षित जिउँदो उल्लु चरासहित एक जनालाई पक्राउ गरेको छ ।

धुलिखेल नगरपालिका–९ विपी राजमार्गस्थित काभ्रेभञ्ज्याङमा सवारी चेकजाँचका क्रममा उल्लु चरोसहित एक जनालाई पक्राउ गरिएको जिल्ला प्रहरी कार्यालय धुलिखेलका प्रहरी नायब उपरीक्षक हरि खतिवडाले जानकारी दिएका छन् ।

पक्राउ पर्नेमा रामेछाप जिल्लाको रामेछाप नगरपालिका–२ भिरकोट का ३४ वर्षीय केशर श्रेष्ठ रहेको प्रहरीले जनाएको छ ।

बिपी राजमार्ग सडकखण्डमा भकुण्डेवेशीबाट धुलिखेलतर्फ हिँड्दै आइरहेका श्रेष्ठलाई शंकालागि चेकजाँच गर्नेक्रममा सोमबार दिउँसो लुकाइ छिपाइ ल्याएको जिउँदो उल्लु चरासहित प्रहरीले पक्राउ गरेको हो ।

बरामद गरिएको चरासहित नियन्त्रणमा लिइएका श्रेष्ठलाई आवश्यक कारवाहीका लागि डिभिजन वन कार्यालय धुलिखेल पठाइएको प्रहरी नायब उपरीक्षक खतिवडाले बताए ।