निषेधाज्ञासँगै उपत्यका छाड्नेहरुको भिड ह्वातै बढ्यो

नारायण गाउँले
२०७८ वैशाख १४ मंगलबार

काठमाडौं । कारोना भाइरस संक्रमणको दोस्रो लहर सुरु भएसँगै सरकारले बिहिबारदेखी निषेधाज्ञो घोषणा गरेपछि उपत्यका छोडेर घर फर्किने संख्या तिब्र रुपमा बढेको छ ।

हिजो बसेको मन्त्रिपरिषद् बैठकले १६ गते देखी वैशाख मसान्त सम्म निषेधाज्ञा गर्ने निर्णय गरेको छ लागि निषेधाज्ञा घोषणा गरेको हो । प्रशासनले निषेधाज्ञा लगाएपछि काठमाडौं उपत्यका छाड्नेहरुको भिड ह्वातै छ ।

कलंकी, बालाजु, कोटेश्वर लगायतका स्थानमा मंगलबार बिहानैबाट सर्वसाधारणको भिड देखिन्छ । उनीहरु गह्रुंगा झोला बोकेर गन्तव्यतिर गइरहेका देखिन्छन् ।

विगतमा जस्तो निषेधाज्ञा लगाइएको समयमा मानिसहरु नहिँडुन् भन्ने उद्देश्यले प्रशासनले दुई दिन घर फर्किन समय दिएको छ।

ट्राफिक प्रहरी महाशाखारामशाहपथका प्रमुख एसएसपी जनकराज भट्टराईका अनुसार पछिल्लो २४ घन्टामा मात्रै ५० हजार ४५६ जना यात्रुले उपत्यकाबाट बाहिरिएका छन् ।

भट्टराईका अनुसार ७ हजार ९ सय गाडी आउट भएको रेकर्ड छ, त्यसमा ५० हजार ४५६ जना बाहिरिएका छन् ।

गत वर्ष एक साताका लागि लगाइएको लकडाउन हप्तैपिच्छे बढेकाले त्यस्तै हुनसक्ने आशंकामा पढ्न र काम गर्न आएका व्यक्तिहरु उपत्यकाबाट बाहिरिँदैछन् ।

विगतमा जस्तो समस्या नहोस् भन्ने सोचेरै बिहीबार बिहान ६ बजेदेखि लागू हुने गरी निषेधाज्ञाको आदेश जारी गरिएको काठमाडौंका प्रमुख जिल्ला अधिकारी कालिप्रसाद पराजुलीले बताएका छन् ।