आइएमई जनरल इन्स्योरेन्सको सभाद्वारा ७ प्रतिशत बोनस शेयर पारीत

नारायण गाउँले
२०७८ वैशाख १२ आइतबार

काठमाडौं । आइएमई जनरल इन्स्योरेन्स लिमिटेडले केन्द्रीय कार्यालय नक्सालमा आयोना गरेको सभाले ७ प्रतिशत बोनस शेयर र शून्य दशमलव ३७ प्रतिशत नगद लाभांश वितरण गर्ने प्रस्ताव पारित गरेको छ ।

उक्त सभा भर्चुअल माध्यमबाट सम्पन्न गरिएको थियो । सभाले यसका साथै कायम हुने चुक्तापूँजीको ४० प्रतिशत हकप्रद शेयर निष्कासन गर्ने प्रस्ताव पनि पारित गरेको छ । साधारण सभाबाट उक्त प्रस्ताव पारित भएपछि कम्पनीले नेपाल धितोपत्र बोर्डमा निवेदन दिएर स्वीकृती प्राप्त गरेपछि निष्कासन गर्ने जनाइएको छ ।

अहिले कम्पनीको शेयर स्वामित्व संस्थापक समूहतर्फ ६० प्रतिशत तथा सर्वसाधारण शेयरधनीतर्फ ४० प्रतिशत रहेको छ । यसमा सभाले संस्थापक समूहको ५१ प्रतिशत र सर्वसाधारण समूहको ४९ प्रतिशत कायम गर्ने प्रस्ताव पनि पारित भएको छ ।

७ प्रतिशत बोनस शेयर वितरण पछि कम्पनीको चुक्तापूँजी १ अर्ब १५ करोड ७५ लाख ८६ हजार रुपैँया भएको छ । उक्त पूँजीको आधारमा कम्पनीले ४० प्रतिशत हकप्रद शेयर निष्कासन गर्ने जनाइएको छ ।