ताप्लेजुङमा छिमेकीले चलाएको गोली लागेर एक पुरुषको मृत्यु

नारायण गाउँले
२०७८ वैशाख १० शुक्रबार

ताप्लेजुङमा गोली लागेर एक जना पुरुषको मृत्यु भएको छमेरिङदेन गाउँपालिका–२ सान्थाक्रामा छिमेकीले चलाएको भरुवा बन्दुकको गोली लागि खड्क लिम्बूको मृत्यु भएको हो।

बिहीबार साँझ सान्थाक्राको दिदीमागाउँका आकाश लिम्बूले चलाएको भरुवा बन्दुकको गोली लागेर उनको मृत्यु भएको थियो।

स्थानीय जालपादेवी निम्न माध्यमिक विद्यालयमा कार्यरत ५० वर्षीय लिम्बूलाई घरको आँगनमा निस्किएको समयमा आकाशले लुकीछिपी गोली प्रहार गरेको जिल्ला प्रहरी कार्यालय ताप्लेजुङले बताएको छ।

प्रताप भनेरसमेत चिनिने ३० वर्षीय आकाश प्रहरीको नियन्त्रणमा छन्।

घटनामा प्रयोग भएको भरुवा बन्दुकसमेत नियन्त्रणमा लिइएको प्रहरीले जनाएको छ।

आकाशलाई घरदेखि केही तल जंगलमा लुकीछिपी बसेको अवस्थामा पक्राउ गरिएको थियो। घटनाको कारण भने खुलेको छैन।