कर्णाली प्रदेशमा मन्त्रिपरिषद पुनर्गठनः फ्लोर क्रस गरेका तीनै जना भए मन्त्री

नारायण गाउँले
२०७८ वैशाख ०५ आइतबार

सुर्खेत । कर्णाली प्रदेशमा मन्त्रिपरिषद पुनर्गठन गरिएको छ । कर्णाली प्रदेशका मुख्यमन्त्री महेन्द्रबहादुर शाहीले शनिबार मन्त्रीमण्डल पुनर्गठन गरेका हुन् ।

पुनर्गठित मन्त्रिमण्डलमा भूमि व्यवस्था, कृषि तथा सहकारी मन्त्रीमा नन्दसिंह बुढा, भौतिक पूर्वाधार मन्त्रीमा अमरबहादुर थापा, उद्योग, पर्यटन, वन तथा वातावरण मन्त्रीमा कुर्मराज शाही नियुक्त भएका छन् ।

शुक्रबार संसदबाट विश्वासको मत लिइसकेपछि मुख्यमन्त्री शाहीले मन्त्रीमण्डल विस्तार गरेका हुन् ।

बुढा यसअघि उद्योग मन्त्री रहे पनि उनले राजीनामा दिएका थिए ।

रिक्त रहेको सामाजिक विकास मन्त्रालय यसअघि कृषि मन्त्री रहेकी विमला केसी र अर्थ मन्त्रालय आन्तरिक मामिला तथा कानुन मन्त्री नरेश भण्डारीको जिम्मेवारीमा छ ।
तीनै जनाले मुख्यमन्त्रीलाई विश्वासको मत दिलाउन शुक्रबारको प्रदेश सभा वैठकमा ‘फ्लोर क्रस’ गरेका थिए ।

फ्लोर क्रस गरेको अर्का सांसद प्रकाश ज्वालालाई भने पार्टीले कारबाहीका लागि केन्द्रमा सिफारिस गरेको छ ।

उनले यसअघि चैत २४ गते आर्थिक मामिला तथा योजना मन्त्रीबाट राजीनामा दिएका थिए । मुख्यमन्त्रीका प्रेस सल्लाहकार ध्रुव बुढाथोकीले यो मन्त्रीमण्डल पुनर्गठनको पहिलो चरण रहेको बताए ।