दिक्तेल बजारको सडक ढलानका लागि थप ५ करोड बजेट

खबर मुकाम
२०७७ फागुन १५ शनिबार

खोटाङ । खोटाङको साविक सदरमुकाम दिक्तेल बजारको सडक ढलानका लागि थप ५ करोड रुपैयाँ बजेट प्राप्त भएको छ। पहिलो चरणमा दिक्तेल बजारको जिरो प्वाइन्टदेखि सिँचाइ गेट, त्रिवेणीचोकदेखि मालपोत कार्यालय र पुरानो बैंकचोकदेखि झिसेपु मन्दिर जाने खण्ड ढलान भइसकेको छ।

बाँकी आरसिसी ढलानका लागि विकास मन्त्रालयबाट थप बजेटको टुंगो लागेको हो। यो बजेटले चालू आर्थिक वर्षभित्रै दिक्तेलको सिँचाइ गेटदेखि नेपाल टेलिकमसम्मको सडक ढलान गरिने दिक्तेल रुपाकोट मझुवागढीका नगरप्रमुख दीपनारायण रिजालले बताए।

उनले भने, ‘प्राप्त बजेटबाट सिँचाइ गेटदेखि टेलिकमसम्मको बजार ढलान गर्नेछौँ। यो चालू आर्थिक वर्षभित्रै ढलानको काम हुन्छ। दिक्तेल बजार ढलान गर्ने कामको निरन्तरताका लागि यो बजेट आएको हो।’

अव्यवस्थित बजारीकरणका कारण दिक्तेल बजारको सडक ढलानका क्रममा कतिपय घर तथा पसलका ढोका छेकिन तथा पसलको ढोका सडकभन्दा माथि हुन पुगेको छ। बजारका घरलाई सडकको सतहसँग मिल्ने गरी पुनर्निर्माण गरे मात्र बजार थप व्यवस्थित बन्दै जाने देखिएको छ।

पूर्वी पहाडका सबै जिल्लाका सदरमुकाम ढलान भइसक्दा बल्ल दिक्तेल बजारमा ढलानको काम सुरु गरिएको छ। दिक्तेल बजार ढलान सुरु भएपछि हिउँदमा धुलाम्मे र बर्खामा हिलाम्मे हुने समस्या समाधान हुने अपेक्षा गरिएको छ।

बर्खा लागेपछि बजारका सडकमा हिँड्नै मुस्किल पर्छ। सदरमुकाम पिच÷ढलान नभएका कारण बर्खायाममा हिलाम्मे हुने गरेको छ।
सडक फराकिलो बनाउन बजारबासीले जग्गा छाड्ने अवस्था नभएपछि स्थानीय विकास शुल्क कोषबाट आर्थिक वर्ष २०७३र७४ मा दिक्तेल बजार कालोपत्रेका लागि आएको बजेट फ्रिज भएको थियो।